Comitadu pro sa limba sarda in s'Universidade, bene bènnidu

Est naschidu in Casteddu su Comitadu pro sa limba sarda in s'Universidade e giai sunt belle 1300 sos chi si sunt iscritos. Unas dies a como, su Comitadu at fatu connèschere cun unu volantinu su chi cheret fàghere in su bennidore. Tenet una pàzina in Facebook in ue unu podet e siat aderire a su Comitadu e siat leare parte in sas discussiones. Custu est su testu de su volantinu.

S'impreu pùblicu de sa limba sarda est parte de sos deretos costitutzionales e de sos decretados dae sa Conventzione cuarnitze europea pro s'ampari de sas minorias natzionales. E però no est petzi custu: gasi comente càpitat in sas regiones europeas in ue sas minorias linguìsticas sunt tuteladas mègius, diat pòdere èssere unu puntòrgiu de s'economia e, duncas, de su traballu.
Paris cun sa limba e totu a in ghìriu suo, sa Catalùnia at fraigadu mìgias de postos de traballu in sos media, in s'imparonzu e in totu sos setores produtivos. In Sardigna gasi no est, finas si sa prus parte manna de sos sardos faeddat su sardu o una de sas àteras bator limbas alloglotas, su gadduresu, su tataresu, su catalanu de S'Alighera, su tabarchino de Caruloforte e Calaseta. In prus, belle su tresunu, mancari non faeddende sas limbas de Sardigna, la cumprendent.
Custu fatu est una cunditzione bona meda pro chi su sardu siat in su bennidore nostru, de giòvanos chi s'iscampiant cara a su mundu de su traballu punnende a abarrare in sa Terra nostra, sena tènnere s'apretu de su disterru pro pònnere a profetu sas cumpetèntzias nostras. A dolu mannu, mancari b'apat sinzales lenos lenos de interessu, sa polìtica paret ghetendesi a surda. Belle surda de su totu est s'Universidade chi cun sa disatividade sua in contu de limba sarda s'est agatada in s'apretu de dèvere torrare a s'Istadu su dinare integradu pro afortiare su sardu.
Su Comitadu pro sa limba sarda in s'Universidade est unu grupu sìncheru, naschidu pro ispartinare sa limba sarda e sa cultura sarda e s'impreu insoro in s'Universidade e naschit in cuncordu cun su Comitadu pro sa limba sarda, punnende a duos obietivos:
- lis dare a sa polìtica e a s'universidade s'impèllida a si interessare a su bennidore nostru de giòvanos detzididos a cunsiderare sas limbas de Sardigna unu motore de s'isvilupu;
- bogare a campu totu sas initziativas chi punnent a afortiare sa limba sarda e sas àteras limbas alloglotas de Sardigna.
Su moimentu, mancari dende cara a sa polìtica linguìstica est in totu a-partìticu e chie bi cheret leare parte o aderire depet pònnere a bandas sa credèntzia sua partitica in su leare parte in sas atividades suas.
Su Comitadu pro sa limba sarda in s'Universidade est cumbintu chi tochet de nche bogare sa limba sarda dae sas paristòrias e dae sos istereòtipos chi l'inghìriant e chi bi cheret un'impèllida noa a s'istùdiu de sa limba sarda e de totu sas gastas linguìsticas de s'Insula.
Su giassu suo in Facebook at a colligire sos testimonzos, sas ideas, sas propostas de totu sos chi nd'ant a cumpartire su progetu.
Isseberare s'universidade che a canale pro sa difusione e sa connoschèntzia de sa limba sarda est un'obietivu chi punnat a li dare unu prus de bàlida a su mundu acadèmicu.