de Roberto Bolognesi
Ja, faghet, ja!
Semus 630 scritos a "vogliamo che i nostri figli studino il sardo a scuola" e 480 a "boleus/cherimos su sardu in sa scola".
Semus pagos o medas?
Si pensamus ca in Facebook bi sunt a su mancu 20.000 sardos, semus pagos.
E si pensamus ca casi su 90% de sos sardos, comente resurtat dae sa circa sotziulinguistica coordinada dae sa Prof.ssa Oppo, cherent su sardu in sa scola, semums pagos meda!
Ma non est gai chi tocat a pensare.
Tocat a pensare ca semus bastantes pro incumentzare una revolutzione curturale: sa prima revolutzione sarda.
Si nos movimus totus ... ma non bi chergio ne-mancu pensare a su chi diat sutzeder: tando sa cosa diat esser bella e fata.
630 babbos e mamas diant andare a faeddare a sa scola: "Po imparai su sardu a is picioccheddus in sa scola, tocat chi nci siant maistus chi ddu podint insenniai e duncas chi ddu scipiant fueddai e scriri. Poi tocat puru chi custu insenniamentu bengat inseriu in su POF de sa scola (bastat chi in su Collegiu de is docentis unu maistu si ndi pesit a ddu domandai).S' atru est cosa chi benit de sei a segunda de su livellu de cumpetentzia chi tenint is pipius, ma est cosa de importu a partiri de su fueddai e sceti a pustis ligi e scriri."(messagiu de Tin Dal a su grupu: "vogliamo che i nostri figli studino il sardo a scuola")
A bi pensades: 630 scolas inue faghent letziones de sardu?
Ma naramus chi si nde movant solu 63 e ca custos resessant a fagher mover sa scola de su figiu.
Tando diamus a tenner 63 scolas inue is pitzinnos studiant su sardu e ateras materias in sardu.
E custa diat esser gia de se una cosa bella e importante meda.
Ma e sa formatzione de is dotzentes?
Si 63 scolas ponent impari sa fortza issoro, faghet a organizare cursos de formatzione de livellu internatzionale e, pro donni singula scola, a baratu puru!
Tocat a pensare ca totu sos studios de sa grammatica de su sardu sunt fatos in logu angenu, ma puru ca sos istudiosos chi los ant fatos sunt amigos mannos de su sardu e ddis iat a agradare a benner a Sardinnia.
E sos pitzinnos de 63 scolas formant giá unu mercadu interessante pro sos editore sardos: diat fagher a pubblicare su materiale didaticu chi serbit (e non esistit) a unu pretziu normale.
E 63 scolas diant esser un'esempru de importu mannu pro totu is ateras scolas e ... pro sos politicos.
Si unu de is 10 iscritos a custo grupos si movet, sa revolutzione partit.
Ello ca non faghet? Ja faghet, ja!
4 commenti:
Istimados cumpanzos 'e amigos,
lezende s'articulu de Bolognesi m'est torrau in conca chi su "problema" si gasi li podimus nàrrere, semper est su matessi: su sardu lu depimus pessare una o milli limbas? Tenet resone Bolognesi cando si preocupat de sa formatzione de sos dotzentes in pare chin totus sos chi diant trballare in s'iscola.
No est pro fàghere s'isconza jocos ma bos naro chi s'amorada mea at conseguidu unu master in "Tecniche di insegnamento e didattica del sardo" et in bidda sua sunt faghende, o menzus, sunt in chirca de fàghere cursos de formatzione pro su personale amministrativu de su cumunu. E pro li faghere sos cursos ant isseberau unu pitzoccu chi benit dae una bidda accurzu in uve si faveddat un'atera variedade de sardu.
Su pessamentu meu est chi, fintzas pro su chi si riferit a sa "didattica" de sa limba, si cada bidda o tzitade o provintzia imparat sa variedade sua, su mercadu de su traballu puru si blocat, e gasi matessi sa possibilidade pro sos zovanos o vezzos, chi cheriana l'imparare su sardu a sos pitzinnos, o partetzipare a sos cursos de formatzione, de lu poder fàghere in sa zona issoro.
Tando, pro torrare a su chi fipo narande, si podet faveddare de sardu in sardu comente semus faghende, pero cando b'at de pesare a s'inegnamentu de sa limba, sa questione de sa limba sarda comuna torrat sempere unu cunsideru de atualidade.
A fàghere ja fàghet, ma comente est a lu fàghere?
Gavinu
E mancu male chi de custu argumentu apo scritu meda e dae meda! A chie tenet ancora dudas, chi fatzat a tenner una bariedade comuna scrita (Grafia Sarda Comuna), che sa chi so impreende innoghe, e totu sa richesa de bariedades de su sardu faeddadu, lu imbito a si torrare a legher su chi apo scrito e chi si podet agatare in medas logos, fintzas in sa retza.
L'apo a fàghere chin piaghere, ma sas dudas, comente nazis bois, ant a abbarràre. Cuntàntu chi sa zente, a resone, sighit iscriende, semus galu faveddande, cada unu in manera sua. E fortzis no azes cunsiderau bene totus sos cursos de sardu chi bi sunt istaos in uve sos istudentes no ant narau màncu una paràgula in sardu,ca no ischìant cale isseberare; e b'ant istadu puru profesores chi no tenìant gana de faveddare in sardu.
B'at zente mèda chi pompiat a sa LSC o caechesìat forma de limba "veicolare", representativa, o aministrativa comente a unu perìculu pro s'identidade chi no est gai fàtzile definìre, e s'articulu de Andrìa Lai at pesau milli preguntas e cusidéros.
Tando, cal'est s'identidade sarda, sa collettiva, sa individuale? No sunt dimandas retòricas sas meas, cherio petzi cumprendere su chi sa zente pessat e sa liba, o variedade de limba chi issèberat.
Faveddande chin istranzos totus nos cusideramus sardos; intr'e nois, chin cumpanzos sardos e totu, cadaunu apartènit a sa zona sua. E custu andat ateretàntu bene, e menzus chi semper siat gasi; ma tocat a cumprendere sa variedade comuna in àtera manera, deo pesso, chi si referit prus a una dimensione diamesica, de su mezu, est a nàrrere s'iscritùra.
Mancari m'irbaglio, ma faghende gai, sas chi como sunt consideradas variedades linguisticas s'ant a pòdere cunsiderare dialetos de unu sardu chi tenzat tratos comunes chin custos dialetos. Chene diminuìre sa grandhèsa de cada una.
Est petzi unu pàrrere meu, b'at millis de traballos chi sghint custu propòsitu.
Gavinu
a custu puntu no importat prus si est menzus sa LSC o sa limba de mesania. Si sos sardos sighimos diasi sa jenna, o sa zenna, fizos nostros ant a finire de la mutire "sa porta". Ddu cherimos cumprendere ca non semus eternos e su tempus at a siccare sa limba paris cun sas carenas nostras?
Innoghe serbit una limba comuna po s'iscritura e bisonza de coitare ca semus andande a passu 'e arbeghe, comente naraiat unu massaiu de 'idda mia.
Posta un commento