de Vittorio Sella
Custa,
comente bos azis a sapire, non è est una paristoria, unu imbentu de
sa mente. Custas sun duas vitas chi si sun imbennitas in s'ora de su
Tempus Firmu. S'una no ischiat de s'atera, ma s'ustinu las at
cherfitas paris pro s'ora lastimosa in s'apposentu
de
unu ispidale sardu. Sa prima est una femina antziana chi desizaiat
pro s'urtimu salutu sa estimenta chi aiat postu pro s'isposonzu a sa
manera de sa bidda sua, una die notita pro cussa zovana meta
cuntenta.
Como
cusu estire li naran Costume Sardo. Sos familiares l'an
accuntentata accudinne cussu desizu chi manteniat caru in su coro e
in sa mente. S'ateru, presente in su matessi apposentu dolorosu, a
curtzu a cussa femina, est unu sardu disterratu dae metas annos, uve
como sos Professores sun guvernanne pro s'Italia e sa Sardigna. Cussu
emigratu sos urtimos annos, abile chin sas manos, accontzaiat
crateas, bancas e banchittas, mobiles e trastes de onzi zenia. Sa
buteca sua fit un abboju de umanitate e de travagliu.
Teniat
una oche lepia chi donaiat cussizos a onzi pessone. Ma a pustis sa
salute l'est mancata a bellu a bellu. E cussa buteca at tancata sa
janna. Sos familiares, ischinne chi si fit cussuminne a sa sola, nche
lu ghiran a sa bidda issoro. E gai est capitatu. Cussa recuida pro
isse, istanne paris chin sos familiares, est istata che unu brincu a
su tempus de sa pitzinnia, a su chelu, a sos sapores, a sos nuscos e
a sos gustos de sa terra sua. Sos familiares l'an donatu onzi
cuntentu, mescamente sos desizos chi no at poitu cuntentatre a foras
de sa terra sua. Su priteru, sa die de sa missa, at contatu chi tottu
cussos sinnos de sarditate l'an annantu animu, mantenenne luntana
pro tantas chitas s'ora iscurosa.
Ite
contan custas duas istorias de vita? Ambas sun cumbinatas su treichi
de martu, sa matessi die chi sos sindacatos in Casteddu an postu
paris prus de bindichi miza sardos A mie paret, canno mi so sapitu,
chi contan sinnos de una sarditate intima e manna, chi campat intro
de sa pessone. Senas de tottu cussos operaios, minatores, feminas,
zovanos disoccupatos chi sun patinne sa mancantzia de travagliu. E mi
paret chi sun presentes senas sinnos de unu desizu de Soverania,
disconnota dae sos Guvernantes de oje, distantes, comente sos de sos
tempos colatos chi l'an negata. E sos dannos non sun mancatos, fertas
chi sun su male anticu e novu de sa Sardigna intrea.
3 commenti:
Ferta manna kussa de colare chene tribagliu, pro zovanos, babbos e mammas de familia, sa vida issoro. Fortzis bi keren fertas e istocada 'e balla a su coro de kussos chi nos guvernana pro li faghes cumprendere ka semus istraccos de patire e ka est passadu su tempus de pessare solu a issos e totu.
Si bastaiana fertas e istocadas de balla, fimus totus ferendhe e isparandhe.
So bidinde chi urtimamente in sas biddas nostras (mancari fintzas in sas tzitades ma de cussu non d isco bene)sa zente est chircande s'ocasione de istare paris cun cale si siat iscusa bastet chi siat. E cando semus totu paris apo osservadu chi non faeddamos prus de polìtica de sos Partidos Polìticos. Ma de politica de chircare de pensare a ube semus andande e dae ube semus beninde. E si no at a cumbènnere a nos che dare borta dae su caminu chi semus andande. E mancari torrare in segus a bìere si no est chi amus coizadu carchi cosa in su tantu cùrrere. A bortas non siat carchi cosa de importante...
Posta un commento