Lucia Baire: unu saludu a is Sherpas de Supramonte

de Roberto Bolognesi

“Alla scuola è affidato l’ulteriore compito di integrare le variegate diversità culturali ed etniche presenti nella nostra terra.” Dae su saludu a sos iscolanos sardos fatu dae s'assessora de sa Cultura, Lucia Baire

Lampu, dimo’!
Como ja faghet a nos ponner de acordu totus: is Sherpas de su Supramonte, is Kirghisos de sa steppa de sa Marmidda, is Balubas de sa padente de su Cixerri, impari a is Inuits de Nord de sa Nurra, a is Maoris de is isulas de Gaddura e a is Nambikwaras de Carloforte.
Como amus a imparare dae sa scola ca semus totu Sardos!
E ite dialu, fit ora chi arribbessit a s’Assessoradu a sa Curtura una persone chi de diversidade curturale nde cumprendet!
S’assessora Baire at cumpresu ca su probblema nostru est sa diversidade etnica e curturale e ca, in custu tempus de crisi economica—iseta un pagu, ma Berlusconi non nos narat semper ca sa crisi est totu una chistione de psicologia? Boh?!—tocat a nos integrare.
Ma comente amus a fagher, nois sardos, a nos integrare in sa sotziedade sarda?
S’assessora non l’at nadu—bastat a bi pensare unu pagu—b’at una manera ebbía pro sa scola de nos fagher integrare in sa sotziedade sarda: cussa de imparare a is pipios sardos sa curtura e sa limba de sa Sardinnia.
Ma tando non cumprendo propriu proite s’assessora de limba non nde faeddat e ne-mancu de curtura sarda.
Ma forsis so sballiende totu!
Pensende-bi, Kirghisos in Marmidda non bi nd’at!
E tando?
De ite est faeddende s’assessora?
Est faeddende de is immigrados?
Balla! Custa non mi l’isetaía: tenimus un’assessora de destra, ma internatzionalista prus de Bertinotti?
Ite dialu limba sarda e curtura sarda!
Semus totus uguales, my friensd: Sardos, Rumenos e Nieddos; Catolicos, Protestantes, Musulmanos e Ateos…
No! Ne-mancu custu mi paret cosa de creer...
De su pagu ca isco de issa, non creo chi cergiat integrare sa religione sua cun sa curtura de sos ateros...
Insomma, a sa fine abarrat una cosa ebbía chi podimus pensare: s’assessora at postu custos faeddos unu infatu de s’ateru, chentza de pensare a su chi cherent narrer.
Pensende-bi, custa frasia est comente una de cussas bellas piciocas chi si bient in televisione—in sa televisione italiana, est craru!—e non narant mai nudda, proite ca non tenent nudda de narrer.

In su programma eletorale de Ugo Cappellacci, in su discursu chi at fatu pro sa die de sa Sardigna e in su pro sos sessanta annos de su Consìgiu regionale, sa chistione de s'amparu e promotzione de sa limba sarda teniat unu rilievu mannu. Su matessi rilievu at tentu sa chistione in su discursu de sa presidente de su Consìgiu Claudia Lombardo, chi, in prus, in un'artìculu in s'Unione sarda at punnadu a costitutzionalizare sa limba sarda in s'Istatutu nou. Petzi eris, faveddende de sa manifestatzione “La Sardegna incontra Roma”, sa presidente at iscritu: “La nostra bandiera, il nostro popolo, la nostra lingua sono i segni distintivi ben riconoscibili che identificano i sardi in qualsiasi latitudine del pianeta”.
In custas dies, a bandas de su saludu a sos iscolanos in ue s'assessora Baire s'ismèntigat de sa limba sarda, comente narat Bolognesi, consigeris de s'ala de Cappellacci e Lombardo ant presentadu duas propostas de lege pro s'iscola. In una si faeddat de “formatzione sighida” de sos mastros de iscola in unu bene de matèrias, dae s'informàtica a s'educatzione isportiva. De limba sarda, mancu s'arrastu. In s'àtera si punnat a pesare in sos pitzinnos una cultura europea. In custa cultura, s'ischit, parte de importu tenent sas diversidades linguìsticas (Sa carta europea, sa decrarazione de Istrasburgo, e gasi e gasi). In sa proposta de lege, de custa chistione de bundu, galu una bia mancu s'arrastu.
Est ladinu chi in su tzentrudestra, gasi e totu comente in su tzentrumanca, b'at a chie istimat sa limba sarda e a chie pensat chi si nde potzat fàghere a mancu. E est craru chi, a bi so ca, non bastant sas lìnias polìticas de sos presidentes de sa Regione e de su Cunsìgiu: bi cherent atziones polìticas chi pongiant in contu chi assessores e cunsigeris sunt in su Parlamentu sardu ca ant naradu chi eja a su programma fatu dae chie s'est candidadu a guvernare sa Regione sarda. Si non sunt prus de acordu, pro onestade lu depent nàrrere, prontos a nde patire sas torradas polìticas e personales. A imbolicare sos eletores no est cosa de agguantare. [zfp]