sabato 19 novembre 2011

Noas malas pro sa limba sarda

Noas malas pro sa limba sarda sas chi essint – pro como a s'ascusa – dae s'Assessoradu regionale de sa Cultura. Las conto gasi, comente mi las ant tumbadas, cun s'isperu chi s'assessore Milia o àtere pro isse las deneghent. Tantu pro comintzare cun sas noas malas, a su che resurtat, Sergio Milia, tataresu de sa Udc, est a puntu de mudare su responsàbile de s'Ufìtziu de sa limba sarda, ponende unu cumpanzu suo de partidu, Renato Serra, in cambiu de Peppe Coròngiu chi dae annos reghet – e a primore – s'ufìtziu e totu.
Ponende a un'ala custu issèberu (Serra podet tènnere panes in bèrtula in contu de polìtica linguìstica  gasi bundantziosos chi mancu imaginamus), su chi pesat pistighìngiu est un'àteru issèberu chi paret presu a custa lìnia noa de sa Regione: su de consentire a s'Universidade de Tàtari de no atuare su Pranu triennale in sa disposta sua chi imperat a sas universidades de imparare sa limba sarda in sardu. A su chi mi resurtat, s'assessore Milia diat chèrrere cunsentire a s'ateneu tataresu de violare sa lege imparende su sardu in limba italiana, ponende mente a unu grustu de professores chi tenent in Giovanni Lupinu su mastru insoro.
In prus b'at, semper e cando siant beras custas boghes, chi s'assessoradu de sa Cultura at a parare a còitu unu balantzu istrìgile meda, ponende pagos soddos pro sa limba sarda, meda prus pagos de sa misèria finas a oe posta.
Torro a nàrrere chi ispero galu chi m'apant contadu paza e chi, a s'imbesse, Milia chèrgiat mantènnere sa paràula chi at dadu ocannu coladu in Fonne.  

2 commenti:

shardanaleo ha detto...

Ma tandu Pepe Koronju no est prus responsabile in s'ufiziu regionale?
Et komo de ite si okupat?

francu ha detto...

Duas cidas fait fui a Gommaiori (Guamaggiore po is italianus), a chistionai de su babbu de cudda meravillosa mascara sarda chi est ziu Paddori.
No po ascurtai a mimi ca s'ind'est andau primu, ma ddoi fut puru s'assessori Milia chi, in italianu po chi nemus hessit pozziu pigai allu po cibudda, hat nau chi funti attenzionaus meda po sa lingua sarda e hant a appariciai grandus cosas de parti de sa Regioni.
Deu dd'hapu cretiu, ma liggendu su chi scris tui, o GFP, m'est passau in menti chi su chi funti preparendu siat s'nterru de sa lingua sarda. In pompa magna, comenti si narat.