domenica 19 giugno 2011

Sa Fiandra, su de 28 istados de Europa?

In Europa b’at chie est traballende a beru pro s’indipendèntzia sua.
Sa Nieuw-Vlaamse Alliantie (N-VA, Alliàntzia Neo-Fiaminga) est unu partidu polìticu fiamingu nàschidu dae s’isorvimentu de sa Volksunie in su 2001. Su N-VA est devènnidu, in su mese de làmpadas de su 2010, su partidu prus rapresentadu in sa Càmera de sos Rapresentantes de s’Istadu federale belga, cun su 29,5% de sos votos, 27 parlamentares, de 150 chi sunt presentes in sa Camera de sos deputados. Unu resurtadu chi perunu movimentu indipendentista fiamingu fiat mai resessidu a otènnere.
S’idea fundamentale de sa N-VA est s’indipendèntzia de sa Fiandra, in intro de s’Unione europea. In manera polìtica e democràtica e non rivolutzionària, est craru, comente cunfirmat finas su programa chi ponet sa paghe comente prioridade assoluta.
S’idea de sa N-VA no est una fantasia ne unu disìgiu, ma una possibilidade reale, ca comente narat Bart de Wever, su presidente suo,  s’Istadu belga «s’est ispoporende» a bellu a bellu, s’est sorvende, s’est cambiende in fumu. Difatis, est dae su 22 de abrile de su 2010 chi su Bèlgiu non resessit a formare unu guvernu!
Su Bèlgiu est membru de sa UE, in manera formale, ma a nàrrere sa giusta, in pràtica, in intro suo, b’at petzi duas entidades a contu issoro: sa Vallònia e sa Fiandra. 
Est finas craru chi chie no nde cheret prus s’intesa de su Bèlgiu est mescamente sa parte fiaminga. S’ùnicu partidu vallone antibelga est su Rattachement Wallonie France, chi non leat prus de su 1% de sos votos.
B’at prus de una possibilidade de praticare custa voluntade indipendentista fiaminga, a pàrrere de sos espertos.
Una est chi, decrarende s’indipendèntzia sua, sa Fiandra diat essire dae sa UE, lassende su nùmene Bèlgiu e sas istruturas istitutzionales a sa Vallònia. Finas ca, connoschende sa paga istima chi sos Fiamingos ant semper tentu pro s’Istadu belga chi at semper afogadu sa limba e s’identidade fiaminga, sende chi comente istadu federale li deviat assegurare paridade, non benit bene a crèere chi siant sos Fiamingos a pretèndere de si mantènnere a sa sola su Bèlgiu! Cosa chi imbetzes diat agradare de prus a sos Vallones!
Un’àtera possibilidade est chi su Bèlgiu, in antis de iscumpàrrere, detzidat de si nch’essire dae sa UE (cosa possìbile pro su Tratadu de Lisbona e s’art. 50 suo). A pustis, sas duas realidades istatales noas diant presentare sa candidadura issoro pro intrare, cada una a contu suo, in sa UE. Comente est capitadu cun sa Repùblica tzeca e s’Islovàchia.

Dae Eja

2 commenti:

giovanni ha detto...

So da pagas dies rientradu da una 'essida a Malta (400.000 mizza de abitantes ind'unu territoriu 80 'oltas prus minore de sa sardigna);una natzione e un istadu indipendente chi faghet parte de sa UE e de su Commonwelt.Cun duas balchittas de sa marina issoro non faghent bintrare perunu migrante(hat a esser chi nois semus democraticos e issos nono), non cherzo bintrare in meritu:de siguru decidint issos comente lis paret e piaghet.
Un istadu giovanu chi abbaidat a sos giovanos e a s'universidade:tottu una situazione a su contrariu de nois.Gai e tottu paret in Belgiu e hat a esser chi sa Fiandra resultet a presse un'attera Malta.
Però da nois po como non b'hat politica indipendente e de importu(po caridade, solu in fortza de numeros);ma prus che sos numeros su chi truncat sas cambas a su presente est su pensare de sa zente in argumentu( a comente paret),chi dat pagu o nudda isperantzia po su tempus benidore.
Binchet de meda s'idea de su "no ti che coles", de "ammentadi chie ses","a in ube cheret arrivare su fizzu de", s'imbidia a segare a frullana, finzas in sos logos prus acculturados, anzis igue puru peus.
Ma toccat chie podet de bi crere e de difendere s'identidade nostra;tottu su chi si podet faghere,mancari pagu, est bonu.

giovanni ha detto...

Iscusade pro s'isvista:
Indipendentista, no indipendente.