giovedì 15 dicembre 2011

Tàtari est galu in Sardigna?

In una cosa tenet resone Francu Pilloni: sa chistione de sa limba sarda pesat pagos cumentàrios in custu blog. Pagos, pro su beru, nde pesat àteru uve puru, cando non b'at de brigare. Pro ite? Ca non b'at interessu pro su sardu? Paret chi nono si est a pònnere mente (si podet averguare abistende in fundu a custa pàgina) a su fatu chi sos artìculos chi lu pertocant sunt de sos prus lèghidos in custa chida. E però est gasi comente narat Francu: sos letores non narant nudda, francu Francu e un'anònimu.
Ma, comente la penso deo, est petzi in custu cunsideru chi Pilloni tenet resone. Gasi e totu comente tenet tortu, a pàrrere meu, “non allineato” (cun chie?). S'Universidade de Tàtari, chi pesat sa simpatia de sos duos, no est una minoria de amparare dae sos assàchios de una maioria mala e ditadora, aragone e prepotente. Est un'assòtziu de istudiados chi non pretendet de abutinare una lege e bia si non de cumbìnchere sa Regione chi est giustu gasi. S'Universidade de Tàtari no tenet perunu òbligu de impreare su sardu veicolare in sas letziones, ma tenet òbrigu a lu fàghere si cheret su dinare chi sa lege (su Pranu triennale pro sa limba sarda) destinat pròpiu a custu.
Non b'at de moricare àteru meda in custa chistione: sa lege, mancari regionale, mancari sardedda e male cuncordade, cheret osservada dae totus, finas dae professores universitàrios.

PS pro s'anònimu “non allineato” - Mi dimando si si podat arresonare de un'assòtziu culturale che a Su Comitadu de sa limba sarda comente as fatu tue, dimandende cantos eletores tenet. Est petzi una perversione polìtica o b'at carchi cosa de peius?   

1 commento:

mario carboni ha detto...

Mi faghet propriu arriere su non allineato cando si preguntat si est dae meda chi faeddo de linba sarda e alloglotte. Forsis no ischit, e fimos nois duos in pari cun ateros precursores, a iscriere la proposta e leze populare subra su bilinuismu, in su 1977. E gai semper tottu su Comitadu pro sa limba sarda. In custa leze , dae sa sale sun bessidas sa 26 e sa 242, sos diritos de sa limba sarda sun parificados a sas alloglotas. Custa peraula no est chi mi piaghet meda, ma est curtza e cheret narrer cadalana, gaddudesa , tabarchina e tataresa. Forsis s'innnoranza tenet iscuscia cun sa zovana etade. Su fattu est chi sos nemigos de sa sardu e de sas alloglotas, si sun inventadu unu fantomaticu cuntrastu de sos partigianos de sa limba srda ( chi cando faeddan de limba sarda intenden semper + alloglotas ) pro dividire su movimentu linguisticu ismentighende chi est s'italianu sa limba glottofaga.