mercoledì 12 settembre 2012

Milliones in Catalugna pedende indipendèntzia. E nois isetende late dae su mariane


Belle duos milliones de catalanos sunt falados eris a sas carreras e a sa pratzas de Bartzellona pro pedire s'indipendèntzia. Est a nàrrere chi cada bator eletores, unu fiat manifestende pro “Catalugna, istadu nou de Europa”, ponende fatu a sa mutida fata dae sa Assemblea Nacional Catalana. Fiat, comente si cumprendet, una manifestatzione unitària chi at collidu paris totu sas fortzas polìticas, dae su tzentru dereta de Convergencia a sa manca indipendentista a sos “eco-sotzialistas” de Iniciativa. Custa est s'imposta torrada a su tentativu, fatu dae su Guvernu de Madrid, de pedire a sa Catalugna una tzessione de soverania in càmbiu de unu imprèstidu de dinare. Dinare chi, de àteru, narant sos catalanos, “est dinare nostru”.
Pro cumprèndere sa chistione, bastat de cunsiderare chi in Catalugna s'istadu ispanniolu collit prus dinare de su chi dassat pro chi sos catalanos si potzant guvernare. E pro custu, su presidente de sa Generalitat Artur Mas at a addobiare a còitu su primu ministru de Madrid Rajoy, pro cuntratare unu raportu fiscale nou. Mas, in pratza eris non bi fiat: “Non potzo pedire s'indipendèntzia in su mentras chi so andende a tratare cun Rajoy” at naradu. E at annantu finas chi est bènnida s'ora de l'intregare a sa Catalugna istruturas de un'istadu.
Si sos catalanos, dae sa manca a sa dereta e dassende a banda sos natzionalistas ispanniolos, a sa crisi li torrant custa imposta, forte e sena dudas, milli chilòmetros a levante, in Sardigna cale est s'imposta sarda a una crisi econòmica chi paret sena essida? Mìgias de operajos dae cabu de susu a cabu de giosso faghent su chi podent pro sarvare su traballu semper prus a arriscu. Dae Portu Turre a Nuraxi Figus, dae Portu Vesme a Otzana su desertu industriale s'est mandighende su chi bi fiat. Una morte annuntziada non dae como, si non dae annos e annos. Tropu còmodu est a lis ghetare sas neghes de custu disacatu a sa polìtica chi, balla!, neghes nde tenet. Sa responsabilidade est de totu sa classe dirigente sarda, dae sa polìtica a sa sindacale a sa culturale a sa imprenditoriale.
Neghe ca est totu sa classe dirigente sarda chi at chertu custa industrializatzione sena isperu, chi at mandigadu una cantidade de dinare bastante a fàghere pròspera sa Sardigna, chi s'ischiat chi non podiat durare tempus meda. Ma neghe, mescamente, ca no at postu mente a unu disignu cale si siat pro sarvare sa Sardigna dae unu disacatu chi fiat a sas bistas. Ne a manca ne a dereta, ne sos sindacados ne sos imprendidores e prus pagu puru sos intelletuales cunventzionados cun sa polìtica, s'est cumpresa una cosa: s'Istadu italianu no est e nen podet èssere una imposta torrada a unu problema, s'istadu italianu est su problema de sa Sardigna. Pensare chi s'istadu italianu siat a gradu de nde bogare sos pees dae sos disacatos de Alcoa, Vinyls, Otzana, Nuraxi Figus e dae totu sas àteras crisis est un'alluinu: podet campare una classe dirigente compradora e dipendente, ma non podet isorvere sos anneos e sas traschias de chie est a puntu de pèrdere su traballu. Mìgias de persones e de famìllias chi sunt che a sos angioneddos pedende late a su mariane.

5 commenti:

p.atzori ha detto...

Po tempus meda su sardu at crefiu creèr de si poder mudare in italianu. S'est postu addirittura in prima fila, rinunziande a sa propria identidade. Est arribau su tempu de si torrare a ponner sos pannos suos.

elio ha detto...

E mariane de late gei nd'at jau, ma late atusconau. Ateru late paret chi non nd'apat. Su ferenu paret intrau in su sambene sardu chi rebusat onni atera cosa. E finas a cambiare pannos paret impossibile.

Domitilla Mannu ha detto...

Su sardu, a dolu mannu, cheret sighire a bestire pannos anzenos e lu mustrat in totu sas maneras. Non b'at esèmpios chi balfant a lu fagher meledare. Caru Atzori,semus abarrados in pagos a la pessare in àtera manera.

p.atzori ha detto...

Sorres e frades caros, sos pannos anzenos si podent cambiare comente podimus 'ettare a terra s'intonacu ezzu de sas domos po lassare sa perda a vista. Fintza s'Italia, s'Italia chi non meritat, a bellu a bellu si podet ettare a muntonarzu, o "riciclare" si nos cumbenit. At a abbarrare in pes solu su chi est bellu chi abbarret, siat pisanu, genovesu, catalanu, ispaniolu, italianu, sardu. Prus a prestu : est a pensare a un'identidade noa de Sardigna. Po custu diamos a ponner impignu po mezorare s'iscola, ca si nono semus a barca pérdia.

Grazia Pintore ha detto...

Signor Elio ho letto che Norace non è più venuto a trovarla perchè non ha l'auto blu,gli dica che,se vuole,gli impresto la mia panda gialla così,venendola a trovare,potrà darci le sue solite pillole di saggezza.Speriamo anche che aiuti questi poveri sardi a risolvere i tanti problemi lavorativi ed ecinomici.Chissà che Norace sia capace di sturare le orecchie ai nostri tecnici che stanno sostituendo i poveri politici tanto oberati di lavoro.