giovedì 25 novembre 2010

Iscrie una lìtera a sos Tres res

A sas pitzinnas e a sos pitzinnos de sas Iscolas Elementares de Sardigna
A sas maistras e a sos maistros

Ocannu, pro sa de deghennoe bias, pro sa die de sa festa nostra, pro su 6 de ghennàrgiu de su 2011, organizamus su Cuncursu Iscrie una lìtera a sos Tres res
Su Cuncursu est pro sas iscolanas e sos iscolanos de sas iscolas elementares de totu sa Sardigna.
Sas Lìteras a sos Tres Res devent tratare, in sardu, argumentos chi istant a coro a sas pitzinnas e a sos pitzinnos de oe.
Sas lìteras devent arribbare a:
SOS TRES RES,
Comuna, Assessoradu de sa Cultura,
08020 LÙVULA (NU),
intro de su 18-12-2010.
Ammentade·bos de iscrìere craru finas su nùmene e su sambenadu bostru, sa carrera e sa bidda in ue istades, su nùmeru telefònicu. In prus, tocat a iscrìere finas su nùmene e sambenadu de sa maistra o de su maistru, s’indiritzu suo e su nùmeru telefònicu.
A sos pitzinnos chi ant a iscrìere sas 20 lìteras prus bellas amus a lassare un’ammentu nostru. Custas lìteras ant a èssere premiadas e, paris cun sas àteras mègius, ant a èssere publicadas in unu libru.
Sos prèmios ant a èssere cunsinnados in LÙVULA , in ocasione de una festa manna de pitzinnas e pitzinnos, su 6-1-2011.

Lùvula, 22 de Santandria de su 2010

SOS TRES RES:
Gasparru, Mertzioro, Baldassarru

3 commenti:

Grazia Pintore ha detto...

Ecco un esempio pratico per rendere viva sa limba sarda.Complimenti signor assessore alla cultura di un paesino molto piccolo,mi sembra?Se prendessero il suo esempio tutti gli altri assessori alla cultura dei tanti paesi e città sarde, sarebbe una cosa splendida.Complimenti ancora

FP40 ha detto...

Salude Tzuanne Frantziscu,

prima 'e totu gratzias de àer postu inoghe su collegamentu a su blog meu.

Sa Lìtera a sos Tres Res est unu abbòviu de importu mannu, una bella manera de pònner sèmenes chi ant a dare frutu in su venidore. Ca est ingulimande sa canàrja minuda a iscrìere in sardu, chi tenimus ispera de nde pesare mannos pro sa defesa e sa crèschida de sa cultura nostra.

Ti fatzo puru sos cumplimentos pro su situ, chi lego cun meda piaghere, finas si s'archeologia e s'istoria non sunt su campu meu. Est una occasione de istaccare e imparare cosas noas. E m'aggradat custu logu de arrejonada tzivile e aberta, ube si dennuntziant sos dannos chi sunt/semus faghende a sa cultura sarda.

A sighire in bonàntzia e a menzus bìdere,
Fabrìtziu

ps: b'est una "r" in prus in sa paraula "Iscrie" in su titulu.

dsc ha detto...

Gràtzias a sa Comuna de Lùvula pro àere agiuadu su Cuncursu ocannu e s'annu passadu. Ma pro totu sos annos in antis tocat a ringratziare sa comuna de Fonne, Nùgoro, Onieri, Ovodda, Ortzai.

Tocat a ringratziare finas s'Unicef chi at semper dadu su patronadu suo a sos Tres Res, mescamente su presidente su biadu de Giannetto Visentini.

Ma mescamente tocat a ringratziare sa sotziedade editoriale PAPIROS chi at imbentadu su cuncursu e l'at leadu a sa manu totu custos 19 annos colados.
Ma ringratziamus finas sos Tres Res, sos pitzinnos chi finas a como ant iscritu a su mancu 10.000 lìteras in sardu, sas maistras (ca maistros no nd0amus mai connotu, mi paret) e babbos e mamas chi ant animadu sos pitzinnos a iscrìere a sos Tres Res. Ma babbos e mamas cherent ringratziados mescamente ca ant imparadu su sardu a fìgias e fìgios. Chie no l'at galu fatu, podet cumintzare finas como a imparare su sardu in famìlia. Mègius tardu chi non mai!

Diegu Corràine
diretore editoriale Papiros