Nos depes milliardu e mesu: e como paga

 Custu est su testu in sardu de s'atu de intima a su guvernu italianu pro otènnere su milliardu e mesu chi s'Itàlia depet a sa Sardigna.

Atu de intima pro s’atributzione de sas partetzipatziones a cumone a sos tributos erariales  cunforma a s’artìculu 8 de s’Istatutu Ispetziale de sa Regione Autònoma de Sardigna . 

Sa Regione Autònoma de Sardigna (cod.fisc. 80002870923), chi at sea in Viale Trento, n. 69, Casteddu  (09123), in sa persone de su Presidente pro tempore, Ugo Cappellacci, in virtude de sa deliberatzione de sa Giunta regionale n. 20/49 de su 15 de maju 2012  antepostu

-      chi  Sa Regione Autònoma de Sardigna, in cunforma a s’art. 8 de sa l. cost. n. 3 de su 1948, "Istatutu Ispetziale  pro sa Sardigna", si giuat de su benefìtziu de unu regime de  partetzipatziones a cumone a sas intradas  erariales de s’Istadu;  chi s’art. 8 de s’Istatutu est istadu annoadu pro more de s’art.1, comma 834, de sa l.n. 296 de su  2006 (lege finantziària de su 2007); 

-      chi su comma imbeniente n. 838 previdit chi "sa partetzipatzione noa a cumone de sa Regione  Autònoma de Sardigna a totu sas impostas erariales intrat a regime dae s’annu 2010  chi, a dies de oe, s’Istadu no at galu dadu esecutu prenu a su regime nou de sas intradas econòmicufinantziàrias  de sa Regione; 

-      chi essit a craru comente non siat de crastinare sa netzessidade de printzipiare, cun urgèntzia manna,  s’esecutu de su regime finantziàriu nou de sa Regione, gasi comente est disinnadu dae sas modìfica  de s’artìculu 8 de s’Istatutu; 

-      chi, pro su chi pertocat custu, s’Amministratzione regionale at postu a fàghere totu sas formas de  cunfrontu cun s’Amministratzione istatale pro su reconnoschimentu de sas prerogativas suas,  garantidas a manera costitutzionale; 

-      chi su cuberu de sas summas chi li tocant a issa etotu non si podet prus transire siat pro more de  s’istadu de crisi econòmica in sa cale est ruta sa terra de Sardigna, chi l’abbisòngiat sas resursas de  cumpetèntzia sua pro parare fronte a peleas, sas cales non si podent prus baliare, de poberesa  sotziale, siat leende in cunsideru sa legitimidade de rivendicatzione de unu deretu, su  reconnoschimentu de su cale at agatadu cunfirma reghente finas in sas sentèntzias de sa Corte  costituzionale . 

Leadu a cunsideru chi 

-      Cun sa sentèntzia n.99 de su 2012, cun sa cale s’est disinnadu su recursu promòvidu dae s’Istadu  pro (intre sos àteros) s’art. 3, comma 1, de sa lege regionale n. 12 de su 2011, sa Corte  costitutzionale at decraradu chi sa chènscia non si podet ammìtere, sende chi s’Istadu aiat istransidu  "de argumentare sas cajones pro sas cales a sa Regione non diat dèvere tocare su poderiu de  medire s’assummadura de sas partetzipatziones a cumone a sos tributos erariales, a tales chi  s’esseret redatzionadu su bilantzu de previsione  ", poderiu chi est s’espressada de s’autonomia  finantziària e contàbile garantida a sa Regione dae s’art. 7 de s’Istatutu; 

-      chi sa cunsighèntzia làdina de custa sentèntzia est chi sa Regione Autònoma de Sardigna, a s’ora de  ammaniare su bilantzu previsionale suo, podet in deretura fàghere fidàntzia subra sas intradas chi  protzedint sas s’art. 8 nou e las depet, antzis, allistrare a manera contàbile; 

-      chi, galu prus in tempos reghentes, sa Corte costitutzionale, cun sa sentèntzia n. 118 de su 2012, at  fatu mentovu de sas relatas a pare intre Istadu e Regione pro su chi atenet a s’autonomia finantziària  regionale, subra su mecanismu de su gasi naradu "patu de istabilidade" e in prus subra sos efetos de  sa reforma mentovada in antis de s’art. 8 de s’Istatutu:  chi in sa sent. mentov. N. 118 de su 2012 sa Corte costitutzionale at apostivigadu chi, ammaniende  s’acòrdiu intre Istadu e Regione a pitzu de sa capia de su patu de istabilidade, sende chi si depet  adotare comente cheret sa protzedura negotziada cunforma a s’art. 1, comma 132, de sa l. 23 de  nadale 2010, n. 220, dae una banda sa Regione depet leare a cunsideru sos òbligos de minimòngiu  de sos gastos chi sighint s’acumprimentu de su patu de istabilidade, dae sos cales, intre s’àteru, sa  Regione Autònoma de Sardigna non at chircadu mai de s’iscostiare; dae s’àtera banda, però,  s’Istadu, depet pigare atu de sas "resursas regionales prus mannas chi resurtant dae s’intrada in  vigèntzia de s’art. 8 de s’istatutu  " gasi comente est reformadu dae sa lege de su 2006, leende in  cunsideru su fatu chi "su printzìpiu de s’echilìbriu chi non si podet derogare in sea preventiva de su  bilantzu de cumpetèntzia apostìvigat chi non podent abbarrare indipendentes e sena  coordinamentu, pro cantu li pertocat, su perfilu de sos gastos e cuddos de s’intrada  chi, duncas, sa Corte costitutzionale, cun sa sent. mentov. n. 118 de su 2012, at acraridu a tempus  cales depent èssere sas relatas econòmicu-finantziàrias intre Istadu e Regione, marchende sa capia  sena duda peruna o possibilidade de pretu, cunfirmende su respetu de s’Amministratzione  Regionale pro sos obietivos de su patu de istabilidade, ma, a su matessi tempus, torrende a decrarare  su deretu prenu de sa Regione a otènnere sas summas chi li tocat a issa etotu a cajone de s’art. 8 de  s’Istatutu, finas in cunsideru de sa netzessidade de acumprire a sas tareas semper prus graes chi  impitzant sa Regione etotu; 

-      chi sas intradas prus mannas dèpidas a s’Amministratzione regionale in virtude de s’art. 8 annoadu  de s’Istatutu ispetziale, giai allistradas in su bilantzu regionale de s’annu finantziàriu 2012, sunt  parìviles a 1.459.545.588, 80 èuro, comente resurtat dae sa medida acumprida ponende in mente a  sos disponimentos de sos cales a s’artìculu 36 de sa L.R. n. 11/2006 e a s’art. 3 de sa L.R. n . 

-      12/2011, impregiudicadu su deretu a sas summas chi resurtant dae s’agualadura dàbile in aumentu a  cale si siat tìtulu; 

acraridu su chi est antepostu e tentu in cunsideru  intimat  sos ufìtzios e òrganos cumpetentes de s’Amministratzione istatale, e pro issos su Presidente de su  Consìgiu de sos Ministros, in persone de su Presidente de su Consìgiu pro tempore;  su Ministeru de s’Economia e de sas Finàntzia, in persone de su Ministru pro tempore;  sa Ragioneria Generale de s’Istadu, in persone de su Ragionieri Generale pro tempore;  cun posta in mora a su matessi tempus  a chèrrere providire a su reconnoschimentu de sas intradas prus mannas e a s’atributzione, intro e no  ultres su tèrmine de 30 dies dae sa retzida de custa intima, de sas summas dèpidas e non pagadas  dae sa prima die de Ghennàrgiu 2010 pro un’assumadura parìvile a 1.459.545.588,80 èuros,  impregiudicadu su deretu a sas summas chi resurtant dae s’agualadura dàbile in aumentu a cale si  siat tìtulu;  non retzende isceda, s’ant a printzipiare, sena preavisu perunu, sas initziativas pretzisas in sas seas  giuditziàrias de cumpetèntzia . 

      Su Presidente de sa Regione Autònoma de Sardigna .