Sa paristòria de sa creatzioni - Is atras dis

de Elio

Sa segundu dia - “Immoi, in mesu de totu custu chi ‘nd’eus bogau, cicaus un’istedhixedhu de is pitius, a luxi bianca giai, ma chi tirit a color’ ‘e oru. Su bixinau suu non depit esseri ne tropu mannu ne tropu pitiu, centu milla ‘ortas milla e milla de atrus solis ant a bastari. In su ballu tundu chi at a badha’i cun is cumpagnus suus, non depit esseri in mes’ e arrolliu, ca dhu at tropu degollu; est mellus chi siat  orus orus de sa galassia, ca dhu at logu prus discansosu. In mesu de  is pianetas chi si funti fromaus cun issu, e ingiriendudidhu dhi faint a corona, e is unus prus acanta e is atrus prus a istresiu, ndi dhu ar’ unu de mannaria giusta e a tretu giustu, fatu precisu precisu poita si dhui potzat fromai e tènneri svilupu sa vida.”
– Aici narat sa Trinidad’ ‘e Deus, e sighidi –
“E in custu pianeta dhu apat aria, e-i s’acua, a su momentu giustu, si dhui pinnighit in is logus de basciura prenendidhu giai totu a parte ‘e pitzus, calendindi che lambrigas callentis de unu celu prenu de nuis niedhas de non si dhui biri atra luxi che i-cussa de i’ lampus a totora, ind’un’istrasura de  non ndi ‘enniri a beni.”
“Su bellu at a essiri,” – est sempri su Fillu chi ndi essit pertiatzedhu (non s’ispanteis: chi est su Verbu fatu a Carre, custa carre, sa natura umana, ‘nd’at a depiri bessiri a pillu, o no?) – “su bellu at a ess’i candu, iscobertas i’ leis de sa Fisica e de sa Biologia, no at a tenneri prus abbisognu de pensa’i a unu Creadori po ispiega’i comenti totu funtzionat s’Universu. – Comenti chi s’agatint leis sentz’ ‘e inc’essiri chini dhas apat fatas. – Feti ca dh’eus fatu nosu de aici, liberu e responsabili de totus is fainas e pesnsamentus suus. Perou de su chi faidi e de su chi non faidi, ‘nd’at a depiri torrari contu. De chi no iat a ess’i unu buratinu in manu nosta e no aiat a minesci ni premiu ni castigu.” 
“Tenis arrexoni.” – custa ‘orta s’Ispiridu Santu, fatu a Columba, mi dh’aciungit fogu; frotzis po si far’a perdonari de no dh’ai torrau a cupas in sa giogada cabudiana – “E no’ acabbat aici: dh’as a intenderi s’acusa de isperditziu po custa Creatzioni; coment’ e-chi, faendudidha issu, sa cosa iat a essi bessia mellus meda.”

Sighi a lèghere

Sa prima dia