Presumidos, arrogantes e, craru, innorantes

de Larentu Pusceddu

Caru Juanne Frantziscu,
as mai intesu chi unu glottologo facat s’inzenieri e unu geometra su mastru de iscola? Penso chi nono. Sos mestieris chi totus poden facher sunu: su zornalista (mancari no s’iscat a iscriere), su sindacalista (mancari no si connoscan sos cuntrattos) e… s’espertu in limba sarda, chena l’ischire faeddare e ne iscrier.
E ti merafizas chi in Nùgoro apan fattu sos irballos denuntziados in s’articulu? Cando sos “tutologos” si suliertan sun peus de su poveru irrichidu / chi peri Deus l’at timìdu. Nd’amus asiu de iscrier romanzos e de gherare pro sa limba nostra. Sos nemicos prus manos los amus inoche, garrigos de arrogantzia, de ignorantzia e de presumidura.