Su gràficu, si podet nàrrere, est canteddu malintrannadu, ponende a pitzos de su sardu e de sa cultura sarda su pesu de totu s'àteru. Ma siat chi sa limba sarda siat apedigada dae sos àteros gastos de s'Assessoradu de sa Cultura siat chi siat postu a bonete, s'unu pro chentu abarrat: s'1% de su chi in su 2010 fiat in su bilàntziu. S'unu pro chentu, contra a su 69 pro chentu chi s'assessora Lucia Baire at postu pro s'Universidade e pro s'istrutzione chi depent èssere a palas de s'Istadu, giai chi e s'una e s'àtera sunt cumpetèntzias suas.
Mancari gasi, s'unu pro chentu est duas bias su chi, paret, Lucia Baire cheret dassare pro sa limba e pro sa cultura: su 0,5 pro chentu. Nessi, est custu chi li resurtat a su comitadu de sos operadores, interpretes-tradutores chi cun sa limba traballant e chi ant cumbidadu a totus a protestare giòvia ch'intrat in antis de su Consìgiu regionale. “Cust'annu puru” narat su comitadu “s'istiu nos at batidu una noa de cabbale: su Guvernu Regionale, custrintu a mutzare sos istantziamentos in bilàntziu, at pensadu bene de che leare su dinare dae ue già bi nd'aiat pagu.
Sa limba sarda, chi "godiat" de s'1 pro chentu de s'istantziamentu de s'Assessoradu a sa cultura e istrutzione, commo nd'at a disponimentu su 0,5 pro chentu.
Est a nàrrere chi finas su pagu chi si podiat fàghere commo no at a èssere prus possibile.
A dolu mannu de chie trabballat in sos laboratòrios iscolàsticos, in sa ràdio, in sa televisione, de sas domos editoras e gai sighende...
Amus detzisu de nos fàghere intèndere, ca paret chi in cale si siat setore b'apat gente chi protestat pro su trabballu suo, petzi nois, chi trabballamus pro su sardu chin su sardu, no aberimus sa buca pro nos fàghere intèndere.
Giòvia, a sas 10 de mangianu, in Casteddu, in dae in antis de su Cussìgiu regionale, in carrera Roma, amus a protestare pro custas mutzaduras chentza cabu”.
E nanchi no aia resone de essere dubitosu chi de sa limba sarda a custa giunta, e naro peri sas chi an a benner, non nde l'afutit nudda...
RispondiEliminaLare', semus tropu zovanos pro nos rèndere a una assessora chi non mantenet sos impinnos leados. Nd'amus bidu àteru che gasi
RispondiEliminaMa tando, no est chi fintzas s'indipendentismu de su Psd'Az est in italianu? Bidu chi sunt guvernande sa regione issos puru istamus a bìdere ite narant/faghent subra custa cosa.
RispondiEliminaE ita s'abetiais de un'assessora stràngia?
RispondiEliminaCalincunu de bona bolla mi bolit spricai ita ddoi fait su Psdaz in sa giunta? Po bellesa?
Pàulu
Si nassione facher salva cheres
RispondiEliminaSa limba depes tennere che istedhu
Ca chin s’istoria e sa cultura tenes/
Territoriu e ratza chin cherbedhu/
Ateros de tie non sun piur meres/
Dae Maddalena finas a Castedhu./
Si medimus sa limba a percentuale,/
Pagu o nudha nde ‘ogamus de cabale./
Chie cicit in sos bancos da via Roma/
O de villa Devoto in aposentos/
Fendhe bilanzios segat truncu e coma/
Pro chi sos ragionieris sin cuntentos/
Importante chi a caput de sa soma/
De amigos no intentendhat lamentos.
Candho sa limba est sepultada e morta,/
Nd’emus a faedhare a ‘Porta a Porta’./
Pro facher fronte a crisis che s’Alcoa/
Vinyls Pultuturri e Machiaredhu/
Chen’ ‘e lassare Othana a sa coa/
No abbastat srubietare in Castedhu/
Intro de nassione chen’ ‘e doa/
Pensendhe onzidunu a s’ortighedhu./
Foras de sa comuna identidade,/
Nudha o pagu meda, pro piedade./
S’istoria e sa cultura meda antiga/
Su territoriu lacanas non cheret/
Pro ratza non b’at ‘ aere mai briga/
Petzi sa limba tocat chi poderet/
Pro rezere che trae totu sa biga/
Solu ca no' bio chie si l’intreghet./
Animu pero’ e bona voluntade,/
Pro ndi la ‘ogare cust’identidade./
Finchè ci saranno persone che scrivono,così bene,in limba e carchidunu fachete puru sa poesia,sa limba, state sicuri, andrà avanti anche senza le false promesse elettorali dei vari partiti.Ad ogni modo continuo ad invidiare chi parla bene il sardo,l'appo nau, a bellu a bellu lu faveddo puru deo.
RispondiElimina