Sos sardistas si ponent sa berrita a tortu e pro su manìgiu de sa limba sarda presentant su contu a su Guvernu sardu chi meda at impromìtidu e tropu pagu at fatu. Tres sunt sas chistiones chi sos consigeris regionales de su Partidu sardu pesant in una interrogatzione a su presidente de sa Regione e a s'assessora de sa Cultura: su fatu chi nudda s'ischit de sa Cunferèntzia chi pro lege si depet fàghere cada annu pro sa limba e pro sa cultura; su fatu chi agabande chi est su Pranu triennale nudda s'ischit de su nou (su chi disinnat s'ispesa pro su 2011, 2012, 2013); su fatu chi s'Osservatòriu pro sa limba no est istadu reunidu mancu una bia.
E lis dimandant a Cappellacci e a Baire si in mesu de sos pessos chi est pretzisu de leare bi siat s'impinnu prioritàriu de atuare sa lege n. 26 pro sa limba e pro sa cultura. Un'àtera dimanda pertocat su pro ite sa Regione no at convogadu nen sas cunferèntzias a pitzos de sa limba nen s'Osservatòriu comente est in obrigu de lege. E, in fines, sos consigeris sardistas lis ammentant a presidente e assessora chi su programa de guvernu tenet s'identidade e sa limba de sos sardos comente puntos de importu mannu: si cheret o non si cheret impinnare sa Regione, e coitende puru, pro leare provvedimentos pretzisos?
Giai fiat ora chi sos consigeris sardistas s'esserent abigiados chi sa de sa limba est una chistione de importu e chi su chi, craru, tenent in su coro si depet bortare in initziativa polìtica. Che a meda àteros sardos, siat ite si siat sa simpatia polìtica insoro, mi so cuntentadu in custu blog puru pro sas paràulas de atentu naradas dae su presidente de sa Regione e dae sa presidente de su Parlamentu sardu. Gasi e totu comente nos fiamus cuntentados meda de su pessu leadu in su Pranu regionale de isvilupu de numenare sa limba comente motore de s'isvilupu econòmicu. Sunt colados meses e meses in su mudore de partidos, grupos parlamentares, consigeris. E beneitu li siat a su Partidu sardu de àere leadu sa paràula, at istentadu tropu, ma, a su nàrrere de su ditzu, mègius a tardu ma non mai. De àteru, no est chi siant a trumas sos àteros partidos e moimentos identitàrios (dae Irs a Uds, dae Sardigna natzione a Fortza paris) pesende sa chistione de sa limba.
Semus in tempos de carestia econòmica, l'ischimus totu, e finas in su domìniu de sa limba e de sa cultura cherent fatos issèberos. Cando b'at pagu dinare, in una amministratzione che in una domo, tocat de leare unu pessu: su cocone o s'aligusta? Chi s'identidade e sa limba siant e depant èssere su cocone non lu naro deo, l'ant naradu, in paràulas prus pagu terra terra, sos presidentes de sa Regione e de su Parlamentu sardu. E tando s'isseberet su cocone. Non b'at 80.000 èuros pro sa Fundatzione Siotto-Pintor chi cheret ammentare sos 150 annos de s'Italia in un'addòviu cun ùndighi relatores istràngios? Passèntzia. In tempos gasi, non si podent pònnere a banda sos restàuros chi non sunt pretzisos e pònnere dinare pro agiuare sa limba a si la campare? E non si podet fàghere su matessi cun sas 378 sagras biddaresas? E cun unos festival chi pintant sa linna pro la batire a Sardigna? Si s'identidade est su chivu de su programma de guvernu, sos abentos de chi de s'identidade si nd'afutit non podent isetare tempos mègius?
Craru, bi cheret unu disinnu coerente, chi poderet sa tentatzione de cumbidare s'aligusta pro èssere à la page. E, comente at propostu su Comitadu pro sa limba sarda, custu disinnu si podet fàghere petzi si totu sas chistiones de s'identidade e de sa limba sunt guvernadas, comente depet èssere, dae sa Presidèntzia de sa Regione. E non dae un'assessore chi, in prus, non mi paret siat a grabu de isseberare si est prus de importu a sarvare sa limba o a pònnere fatu a sas pedidorias de sos restauradores e de sas pro loco in deficit de imbentivas.[zfp]
Pro chi nde pota cumprendhere, duor sun sos caminos bonos pro un impreu fadosu de salimba nostera.
RispondiEliminaUnu pertocat sa literadura ebbia: isetamus a naschere unu 'Padre Dante' in terra nostra o unu Lisandru Manzoni pro che 'ogare in onzi punta 'e mundu s'opera sua, boltada finas-e in Cinesu.
S'ateru pertocat sa politica: a facher su chi ana fatu in sa Provinzia Autonoma de Bolzano pro parare obias a chie no' fidi Altoatesinu.
E ite nde nas? Cale at a essere su caminu pius fatzile?
@ elio
RispondiEliminaNo est naradu chi sa fortza de sa literadura bastet s'obietivu de afortiare una limba. Pensa a su chi est capitadu a Frédéric Mistral, iscritore in otzitanu e prèmiu Nobel. S'otzitanu si nch'est morinde e si la campat pro more de grustos minores de apassionados chi si pagant finas sas Calandreta, sas iscolas maternas.
S'italianu de Dante, tzitadinu de sa Comuna de Firentze, no est naschidu comente italianu; s'impositzione sua est una operatzione polìtica, gasi e totu comente polìtica est sa ferta belle letale a s'otzitanu.
Sa de sos sudtirolesos est una reatzione forte a su tentativu de su fascismu de nche ispèrdere sa limba insoro cun s'italianizatzione a fortza. A sa democratzia italiana, chi si l'at tentada finas issa, no l'est resissida petzi ca est interbennidu s'Onu chi at fatu s'Austria garante de su Sud Tirolu finas a cando in su 1992 Bozen e Austria ant frmadu sa liberatòria, presidente Prodi.
Nois non semus ne in sas conditziones de s'Otzitània ne in cussas de su Sud Tirolu, ma sighit a èssere in Sardigna puru una chistione polìtica: non b'at sarvesa pro su sardu si su podere polìticu no imbestit comente imbestit pro sarbare s'italianu.
Comente desizzo narrare su meu cummentu in limba!Soe comente una neonata chi sachete un azzicu de parolas.Credo che il non rispetto delle lingue minori sia ottusità mentale da parte di tutti i politici,poveri loro.Per quanto riguarda la Sardegna,sono convinta che noi sardi abbiamo un tale amore per la nostra terra che,fregandocene dei politici,renderemo sempre più viva la nostra lingua.
RispondiEliminaBalla! Immoi teneus su PSd'Az chi bollit donai unu sinnali a sa Giunta e sa su Cunsillu Regionali! A bellu puntu seus arribaus! Mancai deu creu chi sa chistioni de sa limba nostra siat de importu mannu po totus cantus, ca si pirmit de si arreconnosci comenti pobulu e fintzas (po chini nci creit) Natzioni, deu no dh'ia a donai mancu unu paghitedhu de fidùcia a su PSd'Az, nimmancu in custu. S'arregordu chi fintzas a un'annu e mesu fait su pròpiu PSd'Az faiat parti de unu Cunsillu e Giunta chi a beru fut traballendu po sa Limba Sarda, chi teniat ideas e progetus crarus, chi nd'iat bessiu sa Limba Sarda Comuna - chi (mi parit) est sa matessi imperada in custu interventu chi s'informat chi "su psd'az li sonat s'isvèllia a sa Regione". Ellu, seguramenti iat a essi peri s'ora de si ndi scidai peri po sa chistioni de sa limba, bitu ca ant fuliau agiumai 17 mesis de tempus sentz'e ndi bogai peruna initziativa, peruna idea, fintzas perunu testu iscritu in sardu. E tandu eja andat beni a dhi sonai s'isvèllia, perou a beru segundu bosetris totu custa stòria no est una "boutade"? Una manera "maldestra" de su PSd'Az po provai a si distìngui de su nudha chi dhui at oindì in sa Regioni? Po mei est de gaici.
RispondiElimina