Una Browning pro se defèndere dae sa limba sarda

No est coladu de badas in custa terra s'autore de unu drama tedescu, disconnotu a su prus de sa gente, si no esseret pro un'allega abarrada in s'amentu: "Cando intendo narende cultura, nche catzo sa segura a sa Browning mea". In dies de oe, pro unos giornalistas sardos, su ditzu diat dèvere èssere canteddu mudadu: "Cando intendo narende limba sarda...".
Càpitat chi in Facebook, dae carchi mese tropas mannas e minores de sardos si sunt postas a iscrivere in sardu e de limba sarda. Carchi una de custas tropas, pro chie a Facebook no lu abitat, e si nde podat sabire:
Deu fueddu in sardu fintzas cun sa genti disconnota e cun issa! (149 iscritos)
Il Sardo come lingua e non come dialetto (129 iscritos)
Amparamus sa literadura sarda (190 iscritos)
I speak Sardinian, Kistionu su sardu (624 iscritos)
Semus totu bandidos barbaritzinos (78 iscritos)
Minchia si dice Nùoro e non Nuòro cazz!!! (1745 iscritos)
Dominiu puntuSRD / .srd (179 iscritos)
Su mare de Aristanis no est fenitzu (96 iscritos)
Open source in Sardu (85 iscritos)
Il sardo nel T9 dei cellulari (1424 iscritos)
Limbasarda (194 iscritos)
Vogliamo una versione di Facebook in sardo (750 iscritos)
Sceglieremo un partito che promuova la lingua sarda (463 iscritos)
Dignità alla lingua sarda, vergogna ai folcloristi (293 iscritos)

In prus de custas tropas, un'àteru muntone chi deo no abito ca nemos mi nd'at fatu ischire. Est de cada sorte unu fenòmenu de importu mannu. Polìticu e sotziale. Mizas e mizas de pessones ant imparadu a impreare su web pro fàghere un'operatzione de crèschida de sa limba sarda chi finas a como fiat a poderiu de sa polìtica (chi totora ziraiat sa cara), de sos giornales chi faghiant che a su pessonazu de su drama tedescu, de sa sienda culturale chi no nde cheriat s'intesa. De sa chistione de sa limba sarda, in fines, pariat si nde fiant interessende petzi unu grustu minore de intelletuales. Su chi est capitende in Facebook (e in sos blogs, in sos zassos internet) est cosa nova.
E ite càpitat tando. Chi s'Unione sarda de oe, pro nàrrere, li dèdicat a sos sardos in Facebook un'artìculu e de custu fatu novu (de importu pro unu giornalista chi, ischende fòghere s'arte sua, de sas novidades si devet abizare) mancu faveddat. Isperamus chi siat petzi ca non si nde sapidu, finas si so timende chi apa tentu sa reatzione chi fia narende. Chi cando intendet narende limba sarda, non tenende ne Browning ne àtera revoltella in manos, impreet un'àtera arma possente: su mudore e sa tzensura.
Pro si defèndere: siat puru chi aforitendesi sa limba, una die finas sos giornalistas che a isse devant imparare su sardu.