La Nuova? Che a sos istrutzos

In su Cussìgiu regionale, eris si sunt festados sos 60 annos de s'Istatutu sardu. In prus de sos arresonos fatos dae sos istràngios (carchi unu modestu mancari chi espertu in contu de istatutos e de costitutziones, unu, Violante, còmpridu a Casteddu pro nos nàrrere ite podimus e ite non podimus fàghere), s'est arresonadu finas de sa proposta de Carta de Logu nova de sa natzione sarda. Est una proposta, amaniada dae unu Comitadu chi la cheret cunfrontare cun su pòpulu sardu pro chi la mudet, si cheret, e la firmet si est de acordu.
Nd'ant faveddadu, in prus de sos chi apògiant s'initzitiva, su presidente de su Parlamentu sardu e su presidente de su Guvernu sardu. S'unu narende chi sa proposta est dinna de èssere leada in cussideru dae su Parlamentu de sos sardos, s'àteru critighendela, comente est deretu suo. Su fatu istat, si nd'est arresonadu.
In una pàgina integra dedicada a su dibàtidu, La Nuova Sardegna de oe est resessida a mancu numenare sa cosa. No naro pro nde faveddare in bonu, ma mancu pro contare su chi aiat naradu Spissu e Soru.
E gasi, sos letores de sos àteros cotidianos, ant ischidu ite fiat capitadu. Sos de La Nuova, nono. Su chi no est contadu, no esistit: e "il grande fratello" at leadu su pessu chi no b'esistit chi Soru, Spissu e sos àteros apant faveddadu de sa proposta de Costitutzione de Sardigna.